Әрине, тұрмыс түйткілі, қаржы тапшылығы қаумалап-қаусырғанымен редакция қызметкерлері өздерінің кәсіби міндетіне, оқырман алдындағы антына адал. Ел мен жер тарихына қатысты әрбір жаңалықтың жедел жария болуы, ел үшін еңіреп өткен ерлердің рухына тағзым – басылымның әр санына өзек болып келеді. Бұл ауқымды іске оқырман қауымды да тартпақ ниетпен өлкетанушыларға бәйге де жарияладық. Алдағы сандарымызда бұрын баспа бетін көрмеген тың тақырыптар үзбей жарық көрмек. Соның бірі – батыс өлкеге белгілі жылқылы бай, Кіші жүздің бас старшыны атанған тархан Есенгелді Жанмырзаұлының өмірі мен қызметіне қатысты мақала әзірленуде. Жаз келіп, жер аяғы кеңіген соң ел арасына, соның ішінде Батыс Қазақстан облысынан тысқары аймақтарға да іссапарларымыз көбеймек. Бүгінгі Қазақстан шекарасынан сырт қалған қандастарымыз да әрқашан ерекше назарымызда. Болашақта олар туралы да сериялы мақалалар жарық көреді. Біздің журналда басталған «Құлпытас сырын ашайық!» айдарымыз Батыс Қазақстан ішкі саясат басқармасы тарапынан қолдау тауып, бұйырса өңіріміздің көне құлпытастары туралы жинақ шығады деген жоспар бар. Міне, осының бәрі Сіз бен біздің, «DANAkaz» тарихи-танымдық журналы мен оқырманның арасындағы берік байланыстың үзілмейтінін көрсетеді. Ендеше, ағайын, «DANAkaz» журналына жазылыңыз, айналаңызға насихаттай жүріңіз! Жаңа маусымда да бір болайық!

Қазбек ҚҰТТЫМҰРАТҰЛЫ,
журналдың бас редакторы