Журналымыздың әр санында оқырман көңілінен шығатын тың дүниелер ұсыну – алғашқы санымыздан бері мақсатымыз еді. Осы жолы біз тарих ғылымдарының кандидаты, журналымыздың тұрақты авторы әрі қолдаушысы Жәнібек Исмурзиннің әйгілі Есенгелді Жанмырзаұлы туралы мақаласын жариялап отырмыз. Архив құжаттарына, ел аузындағы әңгімелерге, шежіре деректеріне және эпиграфикалық ескерткіш – құлпытас мәтіндеріне сүйене отырып жазылған бұл көлемді еңбектің жалғасы журналымыздың алдағы сандарында, 2015 жылғы нөмірлерде жарық көрмек.

Жаңа жылда «DANAkaz» журналы биылғы қаржы қиындығынан сәл де болса құтылып, Сіз бен біз жиі жүздесерміз деген үміттеміз. Әсіресе, Батыс Қазақстан облысының мәдениет саласына басшылық қызметке келген ағамыз, өнер қайраткері, журналымыздың тұрақты авторы Дәулеткерей Құсайыновтың ізгі ниеті мен қолдауын қазірдің өзінде сезінудеміз.

Журналдың осы саны жарық көруіне қаржылай қолдау көрсеткен «Құрылыс өнеркәсібін ұйымдастыру жөніндегі инжинирингтік компания» ЖШС-ның бас директоры Әлібек Сытдықов ағамызға, «Батыс Қазақстан автобус паркі» ЖШС директоры Нұрлыбек Бірманов ағамызға ерекше алғыс айтамыз. Сондай-ақ, әр санының арасына амалсыз үзіліс түскен біздің журналды жоқтап, хабарласқан барша оқырманымызға ерекше алғыс айтып, әрқайсыңыздың отбасыңызға ырыс-ынтымақ, бақ-береке тілейміз! Жаратқан жиі жолығысып тұруға жазғай!

Қазбек ҚҰТТЫМҰРАТҰЛЫ,
журналдың бас редакторы