Батыс Қазақстан өңірінің қазақтары арасында әлдебір іске кірісер алдында «Иа, Сәт!» деп алақанын ысқылап алатын бір дәстүр бар. Бүгінде бастапқы мағынасы ұмытылып, көпшілік ішінде одағайға айналып кеткен бұл сөздің түп-төркіні ХІХ ғасырда өмір сүрген атақты Сәт палуан Қалдыбайұлының есімімен тығыз байланысты.
«Батыс Қазақстан облысы» энциклопедиясының (Алматы, «Арыс» баспасы, 2010 жыл) деректеріне қарағанда, Сәт Қалдыбайұлы байбақты руынан шыққан Даттың немересі екен. Батыс Қазақстан облысы Сырым ауданы Ақкөл ауылынан (бұрынғы Жетікөл кеңшарының №1 фермасы) оңтүстікке қарай 12 км жерде «Сәт бейіті» атты көне қорымда жерленген. Басында бір жағы құлай бастаған үлкен кесене – шошақ мола бар.
Жалпы, қысылтаяң кезде, маңызды іс басталарда Жаратушыдан, әулие-әнбиелерден, аруақты тұлғалардан жәрдем сұрау – халқымыздың дәстүрінде ежелден бар үрдіс. «Иа, Алла!», «Иа, Пірім!», «Иа, Бибі Фатима!», «Иа, Бекет!», «Иа, Мәтенқожа!» секілді «Иа, Сәт!» те осындай тылсым сенімдік сыйынуға жатады.