Қойылымның режиссері – Қуандық Қасымов, Ш. Айтматов атындағы халықаралық сыйлықтардың лауреаты.
Бас суретшісі – ҚР Суретшілер одағының мүшесі, БҚО Суретшілер одағы филиалының төрағасы Қайыр Оразғалиев, ҚР мәдениет саласының үздігі.

Бұл трагедияда Троя құлап, оны грек жауынгерлері талан-таражға салып жатқан кез суреттеледі. Жұртпен бірге тұтқынға түскен Троя патшайымы Гекуба, Гектордың жұбайы Андромаха, Гектор мен Андромаханың сәбиі Астианакстың, Поликсен мен көріпкел Кассандраның тағдырлары аянышты-ақ. Көне Троя кейіпкерлерінің бастан кешкені қазіргі заманның сұрапыл оқиғаларымен астасып кеткені қойылымға бір ерекше рең береді. Болмашыдан басталғандай болған қақтығыстың Троя аруларына қандай зардап әкелгенін көріп, соғыс біткенге лағнет айтқың келеді.