Журналымыздың бүгінгі саны негізінен Батыс Қазақстан облыстық «Орал өңірі» мен «Приуралье» газеттерінің шыға бастағанына 95 жыл толуына байланысты мақалаларға арналып отыр. Еліміздегі өңірлік басылымдардың алдыңғы толқынына жататын әріптестерімізге туған күнінде әдемі тілек айту әдептілік қана емес, сол үнқағаздың ғасырға жуық ғұмырында қызмет еткен Ғұмар Қараш, Ғабдолғазиз Мұсағалиев, Халел Есенбаев, Мұстафа Көкебаев, Ахмет Мәметов, Батырбек Әлжанов, Әбдірахман Байділдин, Рахым Сүгіров, Сәтбек Иманқұлов, Қасым Аманжолов, Абдолла Жұмағалиев, т.б. көптеген алаш арыстарының аруағына тағзым десек те болар. Шыға бастағанына әлі жыл болмаған «DANA.kaz» тарихи-танымдық журналы Ақ Жайық өңірінің аға басылымы қызметкерлеріне өнікті жұмыс, нәтижелі еңбек тілей отырып, газеттің бастауында тұрған аталар аманатына адал болыңыздар деген пейілін білдіреді.