Болса да бұрын басымда бүлік,
Танытқан жансың жасыңда қылық.
Сезімді бұндай көрмеп ем мүлде,
Сағынам қатты... қасыңда тұрып.

Төгеді кеудем жақұт үндерін,
Білсе де бәрін уақыт емдерін.
Жанымнан менің жырақтай көрме,
Бұйырған басқа бақытым менің.

Жүргем жоқ жылай жиып бала мұң,
Тұрса да тағдыр түйіп қабағын.
Өзіңе шексіз ғашық боп жүріп,
Өмірді бірге сүйіп барамын.

Болғасын желік шақтарым желеу,
Өткен күндерді даттадым дереу.
Сұлулығыңа сұқтана қарап,
Ай мүсініңе таппадым теңеу.

Тұрғандай серпіп көрім тұяқты,
Кеудемнен шерлі керім күй ақты.
Азапты күнде ажырар болсақ,
Өзіңсіз өмір өлім сияқты...

Жанардан жайсыз сыр ақтарамын,
Жаныңнан жұмақ тұрақ табамын.
Шынайы саған сезімнен шығар,
Еркек басыммен жылап та аламын.

Көңілден кірбің сұраса кетер,
Жетім жүрегім құласа бетер.
Сен мені қатты сүйетін болсаң,
Жаназамды шығарған күні...
Жыласаң жетер...